لو ناوي تشتري مكن الخياطة وتبدأ رزقك من الشغل ده — سواء من البيت أو عندك ورشة — اهدي دقيقة واقرأ الكلام ده كله.
لو اختارت المكنة غلط هتخسر وقت وفلوس، وفي حاجات بسيطة لو انتبهت لها هتوفر عليك مجهود كبير.
وخلّيني من البداية أقولك
قبل ما نبدأ: لازم تسأل نفسك كويس هل عندي شغل ليها و لالأ و أجيبها جديده و لا مستعمله و بكام و منين و إزاي
1) حدد احتياجك قبل ما تشتري
أول نقطة وأهم نقطة: هتشتغل على إيه؟ شغل خفيف ولا تقيل؟ قطن ولا جينز ولا ستان؟ كل ماكينة الخياطة اتعملت لشغل معين — ما تروحش تشتري صناعي وانت شغلك كله خفيف والعكس صحيح.
اسأل نفسك: هل عندي شغل ثابت؟ هتشتغل 8 ساعات يوميًا؟ ولا ده مشروع جانبي في البيت؟ لو شغلك تقيل ومحتاج إنتاج، ابدأ بصناعي. لو شغلك خفيف وروتين البيت، المكن المنزلية هتوفي بالغرض.
2) جديد ولا مستعمل؟
السؤال دا مهم جدًا. المكن الجديدة ليها ضمان وتوكيل وعمر أطول، لكن سعرها عالي. المكن المستعملة أرخص وترجعلك فلوس أسرع لو لقيت واحدة متظبطة.
المكن الجديد يناسب مين؟
- حد عنده راس مال وشغل ثابت.
- لو خايف من الأعطال وعاوز ضمان.
- لو شغلك تقيل وبتشتغل ساعات طويلة.
المكن المستعمل يناسب مين؟
- اللي ميزانيته محدودة وعايز يبدأ بسرعة.
- اللي عنده صنايعي يظبطها.
نصيحة: لو ميزانيتك على قدّها خليك في المستعمل أو "كسر زيرو" — ولازم تفحصها كويس قبل ما تشتريها.
3) المكان والشخص اللي تشتري منه
التوكيل هو الأفضل لو هتشتري جديد لأن الضمان وقطع الغيار متاحة. لو مستعمل روح لورش الصيانة الموثوقة أو البايع اللي سمعته كويسة. وعلى المواقع الأونلاين — شوف تقييم البائع وروح شوف المكنة بعينك قبل ما تدفع عربون.
لو معندكش خبرة فى مكن الخياطه فعندك حلين ،الاول تاخد حد معاك يكون عنده خبرة لما تيجى تشترىالتانى تشترى من حد سمعته كويس اشتري من حد ثقه
فحص المكنة خطوة بخطوة
وانت واقف قدّام المكنة اعمل الخطوات دي على طول:
- اسمع صوت المكنة — لازم يكون ناعم وثابت، الصوت العالي ممكن يدل على احتكاك ومشاكل.
- حرّك الطارة بإيدك — لو ماشية ناعمة يبقى كويس، لو فيها تقل يبقى في عطل داخلي.
- اختبار بوش عمود الإبرة والكروشيه — ثبت الطارة وحرّك العمود؛ لو بيتحرك معاك يبقى فيه بوش محتاج تبديل.
- اختبار بوش الكروشيه — ثبت الطارة وحرّك الكروشيه لو بيتحرك معاك يبقى فيه بوش
- بص على الموتور — صوته، بدايته، وعزمه. السيرفو أنعم ويوفر كهربا.
- جرب المكنة على خاماتك — لازم تجربها على القماش اللي هتشتغل عليه فعلاً.
- بص على قلب المكنة — لو الزيت اسود جامد أو في لحام/كسر يبقى المكنة كانت منبهدلة.
ولما تيجي تشتتري مكنه إسأل
و إستشير فنيين صيانه مكن الخياطه على جروبات الفيس او حد تكون عارفه عن المكنه
4) ازاي تفرّق بين الأصلي والمضروب؟
السوق مليان تقليد، خصوصًا في جاك و جوكي. ركّز على النقاط دي:
- اسم الماركه مكتوب ازاي: الأصلي الكتابة محفورة نظيفة واللوجو واضح.
- الرقم المسلسل: الأصلي له Serial Number تتحقق منه عند التوكيل.
اهم حاجه :اسم الماركه يبقي مكتوب صح لو لقيت حرف زيادة أو حرف ناقص تبقي المكنه دي صيني مضروبه
| الماركه | الكتابه | ملاحظه |
|---|---|---|
| جاك | jack | الصيني الأصلي |
| جوكي | JUKI | ياباني/تجميع |
| سروبا | SIRUBA | تايواني |
| سنسير | SUNSIR | صيني محترم |
| تيبيكال | TYPICAL | شغله حلو |
5) الأسعار وإزاي تقيم السعر الصح
ما أقدرش أقولك رقم ثابت لأن الأسعار بتتغير يوميًا، لكن شوف الحاجات اللي بتأثر السعر: حالة جسم الماكينة، نوع الموتور (سيرفو ولا عادي)، حالة الترابيزة، وتوافر قطع الغيار. قارن بين المكن (الأفضل و الأرخص و الأقرب ).
| نوع المكنة | مناسب لـ | مزايا |
|---|---|---|
| منزلية | شغل خفيف، تعليم | سعر أقل، سهل الاستخدام |
| صناعية جديدة | إنتاج عالي، شغل تقيل | عمر أطول، ضمان، إنتاجية |
| صناعية مستعملة | ميزانية محدودة، ناس عندهم صنايعي | سعر ممتاز، عائد أسرع |
نصايح مهمة تتجنب بيها الخساير
- ما تجيبش مكنة قبل ما يكون عندك شغل ليها— الركنة بتخسرك.
- ما تختارش الرخيص لو مش عارف تفحص — السعر الرخيص ممكن يكلّفك بعدين.
- استشير فني صيانة أو خد حد معاك عند الفحص.
- ما تثقش في التاجر ثقه عمياء
- غير الزيت ونضّف المكنة بانتظام بعد الشراء.
- لو لقيت المكنة بتفوت غرز من أولها ماتشتريهاش إلا بعد ما تتظبط.
أسئلة الناس وإجابات سريعة (FAQ)
- 1) أجيب ماكينة خياطة صناعي ولا منزلي؟
- لو شغلك مستمر وخاماتك تقيلة ⇒ صناعي. لو شغل خفيف في البيت ⇒ منزلية.
- 2) اشتري جديدة ولا مستعملة؟
- لو الميزانية تسمح وخايف من الأعطال ⇒ جديد. لو عايز تبدأ بسرعة وبميزانية أقل ⇒ مستعمل بس افحصها كويس.
- 3) إزاي أتأكد إن المكنة أصلية؟
- شوف النقش، اللوجو، ورقم السيريال، وجرب المكنة بنفسك. واشتري من توكيل أو بائع موثوق.
- 4) هل موتور السيرفو يستاهل؟
- أيوه — السيرفو أهدأ ويوفر كهربا وتحكم أفضل في السرعة.
- 5) المكنة اللي صوتها عالي تعتبر وحشة؟
- الصوت العالي ممكن يدل على احتكاك أو مشاكل داخلية — خد بالك منه وسبّهاش كده.
لو لسه محتار — خطوات عملية تعملها دلوقتي
- حدد احتياجك ونوع الخامات اللي هتشتغل بيها.
- حدد ميزانيتك واقرر جديد ولا مستعمل.
- روح شوف المكنة بنفسك وجربها على خاماتك.
- لو مش واثق، خد معاك فني صيانة يظبطلك الفحص.
لو تحب أساعدك أبص على مكنة معينة أو تديك رأيي في إعلان، ابعتلي على واتساب دلوقتي