 |
| إزاي تفتح مشروع ملابس أطفال |
بص بقى… لو نفسك تفتح محل ملابس أطفال وتكون صاحب بيزنس يكبر معاك إن شاء الله يوم بعد يوم، يبقى لازم تركّز أوي في الكلام اللي جاي ده. ليه؟ عشان في ناس كتير فتحت المحلات دي وخسرت، وفي ناس نجحت وبقت بتكسب ألوفات… الفارق بينهم إيه؟ إن الناجح فاهم السوق وماشي بخطة، والخسران داخل “توكل على الله” بس من غير دراسة ولا نظام!
المجال ده مش هزار… ومش أي حد يعرف يلعبه. فيه مواسم بتولع نار زي رمضان والعيدين وبداية المدارس… وفيه وقت الدنيا بتهدى. بس الشاطر؟ اللي يعرف يبيع طول السنة من غير ما يوقف شغل ولا يستنى موسم. و دي شوية نصايح ياريت تعمل بيها لو عاوز تنجح في مشروع الملابس إن شاء الله
افهم السوق الأول… قبل ما تصرف جنيه!
أول خطوة يا باشا… لازم تفهم مين اللي هيشتري منك وليه؟
و مين عملائك؟ 👇
- أمهات معاهم أطفال من سن الرضاعة لحد 12 سنة
- ناس بتدور على سعر كويس وجودة مقبولة
- فيه ناس بتركّز على الماركات… وناس عايزة الأرخص
لو فهمت دول… واخترت بضاعة تناسب احتياجهم الحقيقي، يبقى إنت كده عديت نص الطريق.
و هتركز على:
- الملابس اللي عليها سحب عالي طول السنة
- البضاعة اللي مكسبها كويس
- التنوع اللي يخلي الزبون ما يطلعش من غير ما يشتري
نوع و ما متقفّرش المحل على لبس أطفال وبس
الناس معظم السنة بتشتري للأطفال حاجات بسيطة… لكن لو فتحت محل وبيعته لبس أطفال بس، في وقت الركود هتبقي مشكله! طب و إيه الحل؟
كمّل بمنجات تانية مطلوبة زي ويكون ليها علاقه بمشروع ملابس الأطفال اللي إنت فاتح المحل علشانه زي:
- مستلزمات حديثي الولادة (طلبها ثابت على طول)
- أحذية أطفال… وهم دخلين المدرسة هتشوف الخير!
- إكسسوارات زي التوك والشرابات والكابات (مكسبها عالي جدًا)
- ملابس بيت حريمي لأن الأم هي اللي بتشتري أصلا لأطفالها فهاتبقي ضربت عصفورين بحجر.
- شنط مدارس – أطقم سنة أولى حضانة – لبس أنشطة
يعني بأقل مجهود تكسب زبونين بدل زبون واحد… واحدة للأم وواحدة للطفل 😄
🔥 نصيحة غالية: التنوع مش يعني تجيب محل مليان… التنوع يعني تجيب اللي بيتباع و اللي ليه علاقه ببعضه !
ازاي تختار البضاعة صح؟
الفلوس اللي في جيبك هي اللي هتقولك تبدأ بإيه. متحاولش تتقل على نفسك من أول يوم. اشتغل باللي تقدر عليه… وإكبر إن شاء الله وحدة وحدة.
لو الميزانية محدودة:
- ابدأ بأعمار البيبي + من 2 لـ 8 سنين (أكثر مبيعات)
- هات خامات شعبية وسعرها مناسب للناس
- سيب الماركات لما تكبر ويبقى عندك اسم
ولو رأس المال أكبر شوية:
- ضف شوية ماركات + خروج
- خط إنتاج شتوي وصيفي موزون
- اهتم بالعرض والترتيب وتغليف شيك
وعلى فكرة… متشتريش بضاعة كتير في أول شهر… تابع اللي بيتباع وركز عليه.
إفتح في مكان كويس
اختيار مكان المحل من أهم عوامل النجاح:
- قريب من مدارس أو حضانات؟ 🔥 مكسب مضمون!
- جنب دكتور أطفال أو صيدلية؟ هيعدي عليك زبون كل دقيقة
- سوق شعبي؟ بيع كتير وبسرعة
- منطقة راقية؟ تركّز في الجودة والبراند
و إسمع مني: متفتحش في مكان مفيهوش حركة… مهما كان الإيجار رخيص.
إهتم على قد ما تقدر بعرض البضاعة
الزبونة أول ما تدخل… عينها بتشتري قبل إيدها. فخلي شكل المحل منظم يعني:
- الألوان مرتّبة من الفاتح للغامق
- المقاسات متجمعة مع بعضها
- كل ركن لطقم أو فئة عمرية
- فاترينة فيها القطع اللي تخطف العين
- تعليق مناسب يخلي شكل اللبس باين
وخلي الإضاءة بتاعت المكان كويسه … علشان ده بيدي إنطباع كويس و بيبرز جمال البضاعه
لازم لازم تعمل جرد كل يوم
متسيبش نفسك لليوم يعدي من غير ما تعرف:
- اتباع إيه؟
- إيه اللي الناس طالبة وناقص عندك؟
- مين اشترى وبكام؟
- كسبت كام؟
اكتب كل حاجة… دي فلوسك! 👇
- جرد يومي
- متابعة مصاريف بسيطة
- دفتر أو Excel حتى لو بسيط
الجرد اللي هينفعك يوم ما تحتاج توسّع أو تشتري بضاعة جديدة.و خلي بالك إن المال السايب بيعلم السرقه
خليك صياد و هاقولك إزاي
في آخر الموسم فيه ناس بتحرق بضاعه إو عامة شوف الناس اللي بتصفي زي المصانع والموردين اللي عندهم شغل و عاوزين يخلصوا منه
و ساعتها هتشتري:
- أرخص
- أكتر
- وتكسب حتى لو سعرك أقل من السوق
و اعمل أوكازيونات و عروض في اخر الموسم … والزبون يفرح ويجيب غيره.
إهم حاجه التسويق ... محلات كتيير بتقفل بسبب كدا
دلوقتي حتى لو محلّك في مكان كويس، لازم الناس تعرف إنك موجود!
تعالا أقولك على شوية حاجات تعملها :
- إعمل بوستات علي فيسبوك: تصوير كويس من موبايلك وعرض للمقاسات بأسعار واضحة
- إنشر في القروبات
- إعمل عروض صغيرة: زي 10% خصم أول زيارة أو هدايا
- علق ورق دعاية في الشارع والجامعات والمستشفيات
- إعمل يافته للمحل كبيره و إضاءة تبان من بعيد واسم كويس
سوق الملابس معتمد على
- معارفك في المصانع
- موردين موثوقين
- التعامل الحلو مع الزباين
كل ما هتعرف تجار أكتر… كل ما هتلاقي أسعار أحسن.
تتعامل مع الزباين إزاي
عاوزك تعمل الحاجات دي :
- قابل الزبون مقابله حلوه و خليك على طول مبتسم و إضحك معاه
- متضغطش في البيع… سيبها تتفرج براحتها
- مدح اللبس للطفل وهو لابسه… الأم بتحب الكلام ده
- لو الطفل بيعيط… حاول تشغّله بلعبة أو حاجه
أكتر جملة بتكسب التاجر:
“لو ما عجبكيش رجعيه في أي وقت”
إنت كده أمنت الزبونة، وهي كمان هترجع وهتجيب غيرها.
🔥 وإسمع مني النصيحه دي : الناس عمرها ما تنسى المعاملة الحلوة ❤️ خلي الزبون يحس إنك مهتم بيه وبطفله… ساعتها هايحب المكان و يشتري منك و يخلي غيرك يشتري منك إن شاء الله!
طب أحط قد إيه نسبة ربح
في ناس بتخسر الزبون عشان عايز يغلي في السعر… وفي ناس بتخسر تجارتها عشان بتبيع على المكسب البسيط!
خير الأمور الوسط يعني مثلا مثلا:
- في الشعبي: 30% لـ 50% مكسب كويس جدًا
- في الأماكن الراقية: 70% أو أكتر حسب الخامة
- في الإكسسوارات: المكسب أحيانًا بيوصل 200%!
المهم: متبيعش أقل من ثمنك الفعلي… ومتتغرش وتغلي في الأسعار.
أجيب البضاعة منين؟
على حسب منطقتك… بس أشهر أماكن شراء ملابس الأطفال جملة في مصر:
- العتبة – الموسكي (أسعار مختلفة لكل الفئات)
- الحمزاوي (مناسب للشعبي والمناسبات)
- وكالة البلح (تنوع وجودة أعلى)
- الإسكندرية – المنشية (تجار كبار)
- المحلة الكبرى (مصانع بضاعة مصرية خاماتها قوية)
ونسيت أقولك… خد بالك من الأسعار الأونلاين، مش كله مضمون! لازم تشوف الشغل بعينك 👀
إوعي تقع في الأخطاء دي
فيه ناس كتير قفلت بسبب إنها : 👇
- تشتري بضاعة غالية من أول يوم
- تشتري “كمية” مش “طلب السوق”
- تركّز على لبس الخروج وتسيب البيتي
- مفيش عروض… مفيش زبون جديد
- تسيب المحل لحد يخربه ومتتابعش!
أي مشروع مش هاتواليه بنفسك = هتخسر فيه
أركز عل إيه في الشتوي والصيفي
في ملابس الأطفال… المواسم غدارة
لازم تبقى حريص في الشتوي بالذات… لأنه:
- تكلفته أعلى
- المقاسات بتخلص بسرعة
- البضاعة الزيادة بتقعد تخسر
الحل:
- اشتري شتوي على 3 دفعات
- راقب السوق كويس
- متجبش مقاسات كتير من عمر واحد
وفي الصيف؟ الأمور أسهل بكتير.
تجهيز المحل
عشان محلّك يبقى شيك وعملّي… هنجيب شوية حاجات:
- شمعات وتعليقات للحوائط
- رفوف وستاندات
- فاترينة عرض
- إضاءة بيضاء قوية
- مكتب صغير للكاشير
- شماعات أطفال بأحجام مختلفة
- أكياس بطباعة اسم المحل (تسويق ببلاش)
مش لازم تضيع فلوسك علي ديكور غالي… البساطة حلوة.
إمشي علي الروتين ده كل يوم
ده نظام بسيط تحفظه زي اسمك وتعمل بيه:
- أول حاجه خالص : تدعي الله و تتوكل عليه و تتقي الله
- أول اليوم: نظافة + ترتيب + تجديد العرض
- أثناء الشغل: تدي للزبون اهتمام كامل و متضيعش صلاتك
- آخر اليوم: جرد + مراجعة الكاش + تدوين ملاحظات
لو مشيت علي كده… عمرك ما هاتخسر إن شاء الله.
و إمتي أتوسع
لو لقيت الدنيا بدأت تتحسن… وتلاقي نفسك بتبيع وبترجع تشتري كل 10 أيام مثلًا… هنا تقدر تزود:
- مساحة أكبر
- بضاعة خامتها أعلى
- خط ماركات خروج
- قسم بيبي كامل
الخلاصة
محل ملابس الأطفال مش مشروع موسمي زي ما ناس فاكرة… ده مشروع لو خططت له صح، هتلاقي نفسك:
- بتبيع طول السنة
- بتكسب من كذا صنف
- الناس بتجيلك لوحدها
- اسمك بيكبر في السوق
التوكل على الله مع التركيز + المتابعة + التنوع = ربح مستمر
ابدأ صغير… وكبّر شغلك يوم ورا يوم. وربنا يوسعها عليك إن شاء الله