 |
| تفويت الغرز من أكتر المشاكل الشائعة — لكن حلها بسيط لو عرفنا السبب |
عمرك اشتغلت على المكنة واتفاجئت إن الغرز بتفوت؟ يعني تلاقي القماش ماشي تمام، وفجأة غرزة مش موجوده! 😅 المشكلة دي بتحصل كتير جدًا سواء في المكن المنزلي أو المكن الصناعي, بس الحلو إن حلها بسيط لو عملت اللي هاقولك عليه.
في المقال ده هنعرف ليه المكنة بتفوت غرز, وإزاي تحدد السبب بنفسك, وكمان هسيبلك روابط لمقالات تانية هتخليك تفهم الأعطال دي تمام 👇
⚙️ أولًا: الأسباب اللي بتخلي المكنة تفوت غرز
🔹 1. الإبرة مش راكبة صح أو مش مناسبة
أكتر سبب بنشوفه كل يوم! لو الإبرة راكبة بالعكس أو مش مرفوعه للآخر، الخيط مش هيتقاطع صح مع خيط المكوك والمكنة هتفوت غرز. كمان نوع الإبرة بيفرق جدًا، يعني:
قماش خفيف → استخدم إبرة 11.
قماش تقيل → استخدم 16 أو 18.
🎯 يبقى تعمل إيه:
طلّع الإبرة، و ركبها من جديد بالاتجاه الصح، وجرب على حتة قماش.
📎 عاوز تعرف أكتر؟ شوف أنواع الإبر واستخدام كل نوع
🔹 2. توقيت الإبرة والمكوك مش مظبوط
لو طرف الإبرة بينزل بدري أو متأخر عن خُطاف المكوك، الغرزة مش هتتكوّن والمكنة هتفوت. الحتة دي مهمة جدًا خصوصًا في المكن الصناعي ودي اللي إحنا بنقول عليها كفنيين الظبطه فيها مشكله.
🎯 الحل:
شيّك على التوقيت، لو لقيته مختلف، ظبطه حسب الكتالوج أو شوف المقال ده: ا
📎 شرح توقيت الإبرة مع المكوك خطوة بخطوة
🔹 3. شد الخيط العلوي مش مظبوط
يعني لو العيار بتاع الإبره مقفول عليه بزيادة أو سايب، الغرزة مش هتتكون صح. وأحيانًا اللضمه بتاعت الخيط مش بتكون صح.
🎯 فالحل:
هتراجع اللضمه من أولها لاخرها، وجرب تقلّل أو تزود شد الخيط لحد ما الغرزه تبقى مظبوطة.
📎 طريقة ظبط شد الخيط العلوي في المكن: اقرأ المقال
🔹 4. الإبرة بايظة أو فيها رايش
كتير بننسى نبدّل الإبرة وهي بتبقي أصل المشكله! لو طرفها مبري أو فيها سنة رايش صغيرة، الغرزة هتفوت حتى لو كل حاجة تانية سليمة.
🎯 طب الحل:
بدّل الإبرة على طول وجرب. أرخص حاجة في المكنه الإبره ما تبقاش بخيل 😅
🔹 5. سن الخطاف بتاع الكروشيه فيه رايش أو وساخة
لو بيت المكوك متراكم عليه وبر أو تراب أو خبط محشور جواه، أو سن الخطاف فيه رايش، الخيط مش هيمشي بسلاسة والمكنة هتفوت أو حتي هاتقطع خيط معاك.
🔹 6. السنون بتاع المكنه مش طالعة كفاية
السنون دي اللي بتسحب القماش. لو منخفضة أو نازلة زيادة، القماش مش هيتحرك صح، والغرزة هتفوت.
🎯 فتعمل إيه:
ارفع الدواس وشوف ارتفاع الدواس، المفروض تبقى طالعة حوالي 1 مم فوق سطح البلاكه لما الإبرة تبقي في أعلى نقطة ليها فوق. لو مش كده، ظبطها.
📎 عاوز تعرف إزاي؟ شوف المقال ده
💬 نصيحة فنية
لو المكنة لسه بتفوت بعد كل ده، جرب خياطة ببطء وشوف بعينك الإبرة والخطاف — هتلاحظ فين الغرزة بتضيع، وساعتها هتعرف العيب بالظبط. دي طريقة كل الفنيين المحترفين 💪
✅ الخلاصة
المكنة لما تفوت غرز، العيب غالبًا بسيط جدًا. ابدأ بالإبرة والخيط، بعدين شوف التوقيت والتنظيف. متفكش المكنة على طول — امشي خطوة بخطوة، وهتلاقي الحل إن شاء الله.
🎯 لو حبيت تتعمّق أكتر، شوف المقالات دي:
- شرح توقيت الإبرة والمكوك
- طريقة ظبط شد الخيط العلوي
- أنواع الإبر في المكن الصناعي والمنزلي
- صيانة وتنظيف المكنة بشكل دوري
لوعندك أي سؤال أو إستفسار، سيبلي تعليق تحت أو ابعتلي علي الواتساب وهرد عليك إن شاء الله في أقرب وقت وماتنساش تتابعنا علي صفحتنا علي الفيسبوك "صيانه بحد"