لو بتدور على إزاى تظبط الماكنه السنجر فأنا هوضحلك 4 طرق سهلة
سواء كان عمود الإبرة فيه شرط أو من غير شرط، كل الطرق هاتلاقيها في المقال ده. تابعنا لتحصل على كل جديد. يالا بينا نبدأ! 👇
ملحوظة قبل ما نبدأ:
الطارة بتاعت الماكنه السنجل اتجاه دورانها عليك (يعني لما تيجي تلفها علشان تظبطها، لفها عليك)
الطريقة الأولى لظبط المكنة السنجر 👈
ضبط ارتفاع عمود المكنة السنجر
عمود الإبرة بيبقى فيه 4 شرط — سيبك من أول شرطتين وخلينا في الشرطتين اللي من تحت. لف الطارة بإتجاهك لحد ما توصل للنقطة الميتة اللي تحت (آخر نقطة قبل ما يطلع العمود لفوق).
بعد كده فك مسمار العمود الجانبي (خليه ماسك نفسه بس سهل تحركه). ارفع العمود لحد ما توصل أول شرطة من الشرطتين تحت لأول الجلبة النحاس. وبعدين اربط المسمار الجانبي.
ضبط الكروشيه مع عمود الإبرة
لف الطارة لإتجاهك لحد ما توصل الشرطه الأخيرة على العمود على بداية الجلبة النحاس، وبعدين نهوى على 3 مسامير الكروشيه بحيث يكون الكروشيه ماسك نفسه ويخلي سن الكروشيه ياخد من أول التجويف بتاع الإبرة. لازم ما يبقاش فيه نور بين سن الكروشيه والإبرة، وكمان السن ما يخبطش في الإبرة. وبعدين اربط على 3 مسامير الكروشيه.
الطريقة الثانية لظبط المكنة السنجر 👈
هات مسطرة ولف الطارة لإتجاهك لحد ما توصل للنقطة الميتة اللي فوق، ونهوى على مسمار العمود الجانبي. حرك العمود لفوق لحد ما سن الإبرة يبقى مرتفع عن سطح البلاكة 11 مللى. اربط المسمار الجانبي، وظبط الكروشيه زي ما قولتلك قبل كده.
الطريقة الثالثة لظبط المكنة السنجر 👈
لو ما معاكش مسطرة: هات المكوك وحوش من الماسورة بتاعته، حطه تحت عمود الإبرة وفوق البلاكة، ولف الطارة لإتجاهك. أول ما توصل للنقطة الميتة اللي تحت، لازم قاعدة العمود تلمس المكوك.
الطريقة الرابعة لظبط المكنة السنجر 👈
أول ما توصل للنقطة الميتة اللي تحت، يبقى خرم الإبرة نصه بس هو اللي باين. دي الطريقة الرابعة والأخيرة لضبط المكنة بسهولة.
#صيانه_بجد #صيانه_بجد_true_mech #سنجر #سنجل #خياطه #صيانه